Intensamente - Esperiencies d'una neomaestra
Esperiencies d'una neomaestra.
Dempués del mio primer mes nel colexu, una aprendizax perimportante deprendí. Y ye que vivo demasiao intensamente los díes.
Cuerro per tolos llaos, siempres cola sensación de tar llegando tarde a too. Coles clases, colos materiales, colos mios estudios y con too en xeneral. Los tiempos nun son como yo pretendía que fueran. Nun sé si al resto la xente-y pasó lo mesmo qu'a mi, pero si daqué saco en claro de too esto ye que ye perimportante conocer les tos necesidaes, llimitaciones y tiempos. Y una vegada descubiertes, la única vía pa siguir avanzando ye afrontar les dificultaes con too.
Enantes d'entamar, yo sabía que'l trabayu en cierta manera por mui preparada qu'estuviera diba a superame. Enxamás pensé yo que diba a ser por una cuestión tan obvia.
Poro, yá toi equí pa toes aquelles persones como yo entaman agora so carrera profesional na educación p'aconseya-ys un pocoñín.
Equí vos traigo doce conseyos d'esta neomaestra:
- Conoz a to alumnáu: dedíca-yos tiempu, interésate polos sos intereses, estilos d'aprendizax y necesidaes individuales. Esto va ayudate un montón llueu d'adautar los tos métodos d'enseñanza y les tos sesiones sedrán muncho más efeutives.
- Prepárate bien: planifica tos clases con anticipación (pero ensin volvete lloca como yo), sé flexible adáutate a les circunstancies inesperaes o a les necesidaes cambiantes del alumnáu.
- Crea un ambiente positivu: un clima seguro y acoyedor nel aula fomenta l'aprendizax. Poro, establez normes, riegles clares y cencielles, manteniendo siempres una actitú positiva y accesible.
- Sé paciente y persistente: deprender a xente ye una actividá desafiante, especialmente al entamu. Tendrás díes xeniales y otros nun tan buenos. La paciencia, la persistencia y la motivación interna sedrán claves pa esta esperiencia.
- Incorpora diferentes téuniques d'enseñanza: tol alumnáu nun deprende de la mesma manera, al igual que nengún profe enseña emplegando los mesmos métodos. Ye aconseyable qu'emplegues una variedá de métodos y ferramientes didáutiques pa llegar a tolos estudiantes.
- Aprende constantemente: n'educación tamos siempres en cambios continuos. Tar actualizaos y na última ye'l nuesu deber. Participa en talleres y cursos de desarrollu profesional. (Y esto yá como daqué añadíu, yo personalmente tamién dígote que yá nun solo pola llabor que vas desendolcar nel aula teas dafechu actualizada, sinón que tamién a nivel personal ye mui arriquecedor siguir deprendiendo coses nueves tolos díes).
- Establez una comunicación efeutiva: la comunicación en cualquier ámbitu de la nuesa vida ye primordial y n'ocasiones mui difícil d'algamar.
- Controla l'estrés: La enseñanza pue ser estresante. Atopa maneres de relaxar y desconeutar cuando nun teas trabayando. El curiáu personal ye igual d'importante que les programaciones y documentaciones.
- Celebra los ésitos: tanto los del alumnáu, como los tuyos propios. Reconocer los llogros, por pequeños que seyan, ye una gran motivación pa quien-ylu recibe.
- Conviertite nun modelu a siguir: los tos estudiantes observan tolo que faes y deprenden de ti nun solo no académico. Sinón tamién nel comportamientu y nes actitúes. ¿Qué exemplu das?
- Collabora col claustru: comparte esperiencies, nun duldes n'entrugar, debatir sobro nueves idees y recursos colos compañeros. El trabayu n'equipu pue facer que la carga trabayu seya más lixera y al empar qu'arriquecedora.
- Reflexona sobre la to práutica docente: al concluyir el día o la selmana analiza y garra un tiempu pa reflexonar sobre lo que funcionó y lo que se puede meyorar nes tos sesiones. Esta autoevaluación constante ye clave pal crecimientu profesional.
Munches gracies una vegada más y espero qu'al igual qu'a mi toos estos conseyos te sirvan y puedas vivir los tos primeros pasos na educación d'una meyor forma (ensin apuros, nin disgustos).
Vémonos nel mes que vien con muncho más 🤗
Si te prestó o t'interésa daqué en particular, ponte en contáutu conmigo pente medies de les redes.
Un saludu candial, profes 📚
Comentarios
Publicar un comentario